स्मितरेषा फुलली

आकाशीचा चंद्रमा आज ढगाआड दडला

की देण्या दर्शन भूवरी अवतरला

स्मितरेषा फुलली पुनवेच्या चांदण्यागत

वाटते लपून बसावे गालाच्या खळीत

स्निग्ध तेजाचा वर्षाव होतसे पहाताना

उमलत्या यौवनाच्या झोतात हासताना

सळसळत्या वाऱ्याच्या गंधात भिजताना

वाटते लपून बसावे गालाच्या खळीत

गोऱ्या गालावरती आली एक नाजूक बट

सहज चाळा करिता तिजशी दुमडीले ओठ

केसात शोभे फुल गुलाबाचे चांदणे हास्यात

वाटते लपून बसावे गालाच्या खळीत

मदनमस्त हे रूप तुझे..सतेज सुंदर कांती

पायांत वीज... पैंजण रुणझुणती

बावरी नजर करी.. गोड उर्मी हृदयात

वाटते लपून बसावे गालाच्या खळीत

                             -भिवा रामचंद्र परब